TÜREIN
Yaa sulu'u woumain Wajiira, eesü wane süpüshi kemion miyo'u ma'in suulia, kachuweerale'eya süpüshuwa'a, türein sünülia. Süntirüin wane alijunairua a'yataasü. Antüsü süpüla a'yatawaa sünain tü shi'yataainka anain. Palajana eerunnüsü wane türoochi lotusu, süpünainjatü süpüla eijaa tü ipa kanüliakalü müshaija. Keraapa türoochakalü sünain lotuin, a'yataasü maakina sünain ako'ojo mma maa aka saain karateerü. Kettaapa chamünalüin mmakalü, asiraijünüsü yaa soo'opünaa, süpüla shi'itaanüin tü taapülakalü. Alatitna müsia soo'opünaa taapülakalü wane kachuweera atai ma'in süpüla suu'ui tü türeinkalü.
Tü süpülajanakalü suu'ui, eje'ipenajuushi chajee Media Luna, sotpa'ajee palaakalü, antüin shia eere tü müshaijakalü, chayaa uucho'u. Ounaa müsia tü türeinkalü sünain sajaraijüin waneeirua kanüliasü wagon, tüüirua süpülajatü tü müshaijakalü je süpüla korolo. Tü palajatükalü türein, ni'itaala chi laülaashikai sulu'u tü mmakalü Kolompia, chi kanüliakai Belisario Betancur. Antüshii süpüla ni'itaain shia sünain a'yatawaa kettaapa tü süpünakalü; eijasü müshaija chajee uucho'ujee chamüin chaayaa Media Luna. Tüü chajatü aainjünüin sulu'u wane pueulo kanüliasü Albania; wainma laülaayuu eejatükalü nümaa chi laülaashikai sulu'u Kolompia. Tü palajatüka türein sünain ei'kajawaa müshaija chamüin Puerto Bolķvar, ajaraitüsü ja'rai shikii wagon. Süka palajatüin shia, o'unusu jayatta'a sümaa tü süchisekalü.
Tü müshaijakalü oikünüsü sulu'umüin wane mma watta, sümüin alijuna naatajatü, süka wainmain anakalü apüla shia sümüin alijuna. Sulu'upünaa tü süpünakalü eesü ashajuushi aapiria wayuu suulia ouktajüin sutuma tü türeinkalü je suulia ouktajüin namünüin müleka sülatülee wanaa sümaa.
Jalia pümünüin suulia tü türeinkalü! Pürüleejapan, wattalu'u putuma suulia.
Jalia ne'e pia eewalaa sutuma tü türeinkalü!
Piisalaja pukuwa'ipa suulia. Süka jamüin tü türeinkalü keewainrü mürülü je wayuu.
